قطر کې د طالبانو د دفتر سیاسي مرستیال، ملاعبدالغني برادر وايي چې د افغانستان راتلونکی نظام باید اسلامي او ټول شموله وي.
هغه چې د بشردوستانه او شخړو څیړنیز مرکز یوه پروګرام کې خبرې کولې ټینګار یې کړی چې د راتلونکي نظام مسوولیتونه به د عامه نبسټونو ساتنه، د اسلام پر بنسټ د ښځو او رسنیو حقونو ساتنه او له ټولو هېوادونو سره ښې اړیکې وي.
په همدې حال کې د افغانستان د اسلامي جمهوریت مرکچي پلاوی د سولې خبرو کې اوربند له مهمو موضوعاتو بولي.
دا لومړی ځل دی چې ملا برادر د راتلونکي نظام په تړاو خبرې کوي او وايي ټول شموله نظام، د عام المنفعه تاسیساتو ساتل، د اسلام پر اساس د ښځو د حقونو ساتنه، د بیان ازادي باید د اسلام او ملي ګټو خلاف نه وي، د نشه یي توکو د کښت او قاچاق مخنیوی، له ګاونډیو او نړۍ سره ښې اړیکې او د نړیوالو مرستو د جلب دوام به د راتلونکي نظام ځانګړنې وي.
خو د افغانستان حکومت د جمهوریت نظام، اساسي قانون او د تېرو دوو لس ییزو لاسته راوړنې د سولې خبرو کې مهمې بولي.
د ولسمشر د ویاند مرستیال، دواخان مینه پال څرګندوي:«دا د افغانستان د خلکو غوښتنه ده، ځکه د مشورتي لویې چرکې پرې همدا دي چې جمهوریت او دوام یې د دوی لپاره اساسي بحث دی.»
له بلې خوا د سولې خبرو تګلارې یوه کاپي چې طلوع نیوز ته رسېدلې ده ښیې چې دا خبرې د څلورو اصلو پر بنسټ ـ د امریکا او طالبانو ترمنځ د سولې هوکړې، د تلپاتې سولې لپاره د افغانستان د خلکو غوښتنې، د سولې تامین لپاره د دواړو لورو ژمتیا او د سولې تامین لپاره د ملګرو ملتونو غوښتنې پر اساس مخې ته وړل کیږي.
پاکستاني خبریال، طاهر خان وايي:«مقدمه کې چې څه دي هغه دا چې د افغان ولس د تل پاتې سولې غوښتنه، نو که دې ته وګورو، دا مهمه ده.»
دا تګلاره یوویشت مادې لري چې مهم یي د سولې خبرو پرمهال متقابل احترام، د خبرو اورېدو لپاره حوصله مندي، د کاري ډلو لخوا د اختلافاتو حل، که شرعي اختلاف رامنځته شو ګډ پلاوي یې هوار کړي، د مذاکراتو بهیر باید ولیکل شي، د خبرو پای کې دواړه لوري هغه متن له رسنیو سره شریک کړي چې پرې هوکړه وي، د خبرو تسهیل کوونکي به د خبرو پرمهال نه وي، د خبرو محرمیت باید وساتل شي، د خبرو له ځایه باید رسنۍ لیري ووسي، دي.
ازاد خبریال، سمیع یوسفزی څرګندوي:«زما مالومات دا دي چې اجنډا کې درېیو ټکو باندې اختلاف شته او کله چې دوی اختلاف سره پیدا کړي، ځکه درېیمګړی نشته، نو دوی له بندون سره مخامخ کیږي.»
نن د لیندۍ ۲۰مه نېټه دوهمه او وروستۍ ورځ ده چې د سولې خبرو مرکچي پلاوي د اجنډا په تړاو ډله ییزې خبرې کوي او تمه ده چې دواړه لوري د اجنډا په تړاو د خبرو پایلې ګډې ناستې کې اعلان کړي.