د کورنیو چارو وزارت وایي،د تیر کال په وروستیو شپږو میاشتو کې د جنايي جرمونو په تړاو څه باندې دولس زره کسان نیول شوي دي.
کورنیو چارو وزارت وايي، د ۱۴۰۲ هجري- لمریز کال په وروستیو شپږو میاشتو کې په ټول هېواد کې څه باندې ۱۲ زره کسان د جنايي جرمونو د ترسره کولو په تور نیول شوي دي.
د دغه وزارت ویاند زیاتوي، دغو کسانو په نږدې ۹ زره جنايي پېښو کې لاس درلود او په وینا یې له دغو کسانو یو شمېر سپکې او درنې وسلې او همداراز یوه اندازه چاودېدونکي توکي هم ترلاسه شوي دي.
د کورنیو چارو وزارت ویاند، عبدالمتین قانع و ویل: پولیسو په دغو پیښو کې څه باندې ۱۲ زره مظنونين نیولي دي. او ۷۳۳ نور د تښتېدلي چې د امنیتي ځواکونو تر څار لاندې دي.
د کورنیو چارو وزارت ویاند زیاتوي، پر انسان تښتوونکو د عملیاتو په ترڅ کې څه باندې شلو انسان تښتوونکو ته مرګ ژوبله اوښتې او شاوخوا ۱۷۰ نور یې نیول شوي او همداراز د یادو کسانو له منګلو ۱۸ تښتول شوي کسان هم آزاد شوي دي.
د نوموړي په وینا، د فساد پر وړاندې د مبارزې په برخه کې هم د دغه وزارت د کورني امنیت له لوري ۸۰۰ کسان چې، ډېری یې نظامیان دي نیول شوي دي.
د کورنیو چارو وزارت ویاند، عبدالمتین قانع په دې تړاو داسې و ویل: پر انسان تښتوونکو د پولیسو د عملیاتو په ترڅ کې ۲۱ انسان تښتوونکي وژل شوي او درې نور ټپیان دي. باید وویل شي چې د انسان تښتوونې ۱۹ پېښې ثبت شوې دي. چې د تېر پرتله دغه پیښې راکمې شوې دي.
د کورنیو چارو وزارت ویاند همداراز وايي، د تېر کال په وروستیو شپږو میاشتو کې ۱۹ زره امنیتي سرتیري له مسلکي زده کړو فارغ شوي او دمګړۍ نږدې ۳۰ زره نور په ورته زده کړو بوخت دي.
د نوموړي په وینا، د ظرفیت لوړونې له پروګرامه هم څه باندې ۱۷۰ ښځې فارغه شوې دي.
د کورنیو چارو وزارت ویاند، عبدالمتین قانع په دې تړاو و ویل: د پولیسو ۱۶۷۱ منسوبین چې ۱۷۱ یې ښځې دي، د پولیسو له تحصیلي زده کړو، د ظرفیت جوړونې له بیلابیلو برخو فارغ شوي دي.
د کورنیو چارو وزارت مسوولین همداراز وايي، د تېر هجري- لمریز کال په وروستیو شپږو میاشتو کې د ټرافیک، پاسپورټ، د عامه ساتنې ملي تصدۍ او نورو برخو څه باندې ۱۳ میلیارده افغانۍ عواید هم راټول کړي دي.
په دې اړه مو اندونه