له پاکستان او ځينو نورو ګاونډیو هېوادونو د افغان کډوالو را ایستل د ۲۰۲۳ زیږدیز کال له مهمو پېښو څخه وو.

د ایران او ترکیې هېوادونو له لوري له افغان کډوالو سره بد چلند لا هم دوام لري او سلګونه کډوال بېرته افغانستان ته را اړول شوي دي.

په دغه کال کې په پاکستان کې چې په تېرو څلوېښتو کلونو کې یې تر ټولو ډېرو افغان کډوالو ته ځای ورکړی و، د لنډمهالي حکومت په راتګ سره د مېشتو افغان کډوالو په وضعیت کې بدلونونه راغلل. دغه هېواد د اکتوبر په درېیمه په یوه بې ساري اقدام کې د ۱،۷ مېلیونه افغانانو په ګډون په پاکستان کې مېشتو کډوالو ته د نومبر تر لومړۍ نېټې وخت ورکړ چې له دغه هېواده ووځي.