د هېواد د ټکوانډو د لوبغاړو شپږ کسیزه ډله نن (سې شنبې د سلواغې په ۲۱مه) د توکیو اولمپیک سیالیو کې د ونډې د ترلاسه کولو د چمتووالي په پار ازبیکستان ته په سفر ولاړه.
ټاکل شوې ده چې دغه لوبغاړي په ازبیکستان کې له یوه ۱۵ ورځني ورژشي پنډغالي وروسته، د اسیا اولمپیک سیالیو کې چې تر راتلوونکو درېیو اوونیو د اردن په کوربتوب به جوړې شي، ګډون وکړي او د توکیو د اولمپيک د سیالیو د ونډې جواز ترلاسه کړي.
په دغه پنډغالي کې څلور هلکان او دوه نجونې حضور لري او د توکیو د اولمپیک سیالیو کې د حضور لپاره چمتووالی نیسي.
د توکیو د اولمپيک سیالیو ترسراوي ته له شپږو میاشتو کمه موده پاتې ده.
د ټکوانډو لوبغاړې سمیه غلامي وايي:«موږ د توکیو د ۲۰۲۰ اولمپیک سیالیو د ونډې د ترلاسه کولو لپاره چمتووالی نیولی دی او د هېواد لپاره به ویاړ ترلاسه کړو.»
د هېواد د ټکوانډو لوبډلې روزونکی بشیر تره کی هم وايي:«چې د دغه پنډغالی جوړېدل د لوبغاړو د تخنیکي کچې لپار به ګټور وي او د هېواد لوبغاړي به د اسیا د غوره لوبغاړو ترڅنګ، په دغه پنډغالي کې خپل تمرین وکړي.»
د توکیو د اولمپيک سیالۍ په نړۍ کې د کورونا ویروس د خپرېدو له امله، وځنډول شوې او ټاکل شوې په روان زیږدیز کال کې ترسره شي.