د جاپان دولت په دې وروستیو کې د افغانستان یو شمېر خیریه او بشري بنسټونو ته د لسو میلیونو ډالرو مرسته کړې ده.
په همدې حال کې، په کابل کې د جاپان سفارت په خبرپاڼې کې ویلي دي چې دا مرستې به د بشري مرستو په ښهوالي په ځانګړې توګه له ایران او پاکستان څخه د راستنو شویو کډوالو لپاره ولګول شي.
همداراز ویل شوي چې له دې پیسو به سیلابځپلو، د امنيتي ګواښونو، طبیعي پېښو زیانمنو شویو او هغو کسانو سره مرسته وشي چې د ناسمې تغذیې له امله زوریږي.
ټاکل شوې ده چې د دې پيسو له ډلې ۱،۴ میلیونه ډالره یې د ملګرو ملتونو د کډوالو کمېشنرۍ ته ورکړل شي، تر څو په خپله خوښه هېواد ته د راستنو شویو کډوالو سره مرسته وکړي.
ترڅنګ به یې له یادو ۱۰ میلیونو مرسته شویو پیسو څخه په خوست او پکتیا ولایتونو کې د کډوالو انساني مسایلو کې هم ولګول شي.
خبرپاڼه کې زیاته شوې ده چې کابو ۷۶۱۹۰۰ډالره به د ماشومانو ملاتړ صندوق یا یونیسف ته ه م ځانګړې شي تر څو د زیانمنونکو ماشومانو سره په هره برخه کې مرسته وشي.
ټاکل شوې ده چې دوه میلیونه ډالره هم د ماینپاکونې په موخه د ملګرو ملتونو د ماینپاکۍ ادارې ته وسپارل شي.
۳،۱ میلیون ډالره یې د خوړو نړیوال سازمان ته ورکول کېږي او ۳،۱ میلیون ډالره به هم د کډوالو نړیوال بنسټ ۱۴۸۰۰ په خپله خوښه راستنو شویو نا ثبت شویو کډوالو لپاره ولګوي.
دا په داسې حال کې ده چې جاپان په تېرو ۱۵ کلونو کې د افغانستان په امنیت او ټولنیزو برخو کې مرستې کړې دي او د ۲۰۰۱ زیږدیز کال راهیسي یې مرستې کابو شپږ میلیارډه ډالرو ته رسېږي.