د صنعت او سوداګرۍ وزارت سرپرست نورالدین عزیزي د افغانستان او قزاقستان په سوداګریزې ناسته کې د سوداګرۍ پر پراختیا، د پانګونې پر جلب او ټرانزیټ ټینګار کړی دی.
ښاغلی عزیزي د یوه پلاوي په مشرۍ قزاقستان ته تللی. هغه دغه ناسته په هېواد کې د خصوصي سکټور د راکړې ورکړې د زیاتوالي په برخه کې مهمه بللی ده.
نورالدین عزیزي په دغې غونډه کې زیاته کړه:«زما په اند هغه غونډه په سوداګرۍ او نړۍوالو همکاریو کې مهمه شمېرل کېږي. دغه ناستې د شرکتونو لپاره مناسب فرصتونه رامنځته کوي چې خپلې سوداګریزې شبکو ته پراختیا ورکړي او سوداګریزې اړیکې لا پیاوړې کړي.»
له دې سره سم، یو شمېر سوداګر پر دې باور دي، د افغانستان او قزاقستان تر منځ د سوداګرۍ د ودې لپاره اړتیا ده چې په تړونونو کې اسانتیاوې رامنځته او بانکي محدودیتونه لرې شي.
سوداګر محبوب الله محمدي وویل:«د دوو هېوادونو ترمنځ د ګډ بازار رامنځته کېدل، د اقتصادي اړیکو د زیاتوالي او د سیاسي اړیکو د ارتقا لپاره باید د دواړو هېوادونو ترمنځ له بنسټيزو بحثونو څخه وي او باید په دې هکله بحث وشي.»
له بل لوري د سوداګرۍ او پانګونې خونه وايي، هڅې روانې دي چې، افغانستان د قزاقستان له لارې له چین او نورو هېوادونو سره وصل شي.
د دغې خونې د سرپرست په باور، د افغانستان او قزاقستان تر منځ د سوداګرۍ د ګډې خونې جوړېدل کولی شي د دواړو هېوادونو تر منځ د اړیکو له ښه والي سره مرسته وکړي.
د سوداګرۍ او پانګونې خونې سرپرست محمد یونس مومند څرګندوي:«هیله لرو چې د افغانستان او قزاقستان ترمنځ دغه سوداګریزه غونډه او ګډه خونه یوه ځای ته ورسېږي چې موږ د دواړو هېوادونو په اقتصاد کې فعال روال ولرو.»
د صنعت او سوداګرۍ وزارت سرپرست له ځينو سوداګرو سره د سېشنبې په ورځ قزاقستان ته ولاړ او ټاکل شوې په دغه هېواد کې په یوه جوړ شوي نندارتون کې هم ګډون وکړي.
د ویلو ده چې، په دغه نندارتون کې ۷۰ غرفې افغان سوداګرو ته ځانګړې شوې دي.
په دې اړه مو اندونه