قرار است رییس‌جمهور اشرف غنی در نشست سران سازمان همکاریهای شانگهای که روزهای شنبه و یک شنبه در شهر ساحلی "چینگدائو" در چین برگزار خواهد شد شرکت کند.
هژدهمین نشست سران سازمان همکاریهای شانگهای تا دو روز دیگر در چین برگزار می‌شود.
وزارت امور خارجه می‌گوید که محور گفت‌وگوها در این نشست چگونه‌گی پیکار با هراس‌افگنی در افغانستان و منطقه است.
صبغت الله احمدی، سخنگوی وزارت امور خارجه، در این باره به طلوع نیوز گفت: «افزایش نبردها در افغانستان و پیامدهای آن بر کشورهای منطقه یکی از نگرانی‌های اعضای این سازمان استند.»
یو بین، سفیر چین در تاجیکستان، گفت: «تاجیکستان سهم فعالی در بخش امنیتی سازمان همکاریهای شانگهای دارد.این برای همه روشن است که تاجیکستان از بهر همرز بودن با افغانستان از اوضاع آن کشور و نفوذ هراسافگنان شیطان صفت به آسیای میانه متأثر شده است. همچنان به گونه جدی از قاچاق مواد مخدر تهدید می‌شود. پس تاجیکستان سخت نیاز به تقویت همکاری نظامی سازمان شانگهای دارد.»
رییس اجراییه نیز در سفرش به لندن همکاری صادقانه کشورهای منطقه را در تأمین امنیت افغانستان و منطقه اثرگزار خواند.
در این نشست رییس جمهور، وزیرامورخارجه و شماری دیگری از مقام‌های حکومت وحدت ملی شرکت خواهند کرد.
وزارت امور خارجه می‌گوید که کابل می‌کوشد تا عضو همیشه‌گی سازمان همکاریهای شانگهای شود.