د جمعیت اسلامي ګوند مشرتابه شورا غړي د ولسمشرۍ ماڼۍ د پرېکړې په اړه د خپلې پرېکړې د سلامشورې په حال کې دي. له دې وړاندې جمعیت اسلامي ګواښ کړی وه، که‎چېرې د بلخ والي عطا محمد نور ګوښه کړل شي، د ملي یووالي له حکومت سره به سیاسي پرېکون وکړي.

ویل کېږي چې جمعیت اسلامي ګوند مشر او د بهرنیو چارو سرپرست وزیر صلاح الدین رباني په خپل کور کې د دغه ګوند د مشرتابه شورا له غړو سره غونډه جوړه کړې او د بلخ د والي په وړاندې د ولسمشر د پرېکړې په اړه سلامشورې وکړي.

اجرايي رییس عبدالله عبدالله چې په ملي یووالي حکومت کې د جمعیت استازی دی، په دغې غونډه کې حضور نه درلود او دفتر یې هم په دې اړه څه ونه ویل.

په ورته وخت کې، ځينو سناټورانو او د ولسي جرګې غړو د ښاغلي نور د استعفا په اړه بېلابېل غبرګونونه وښودل.

د مشرانو جرګې غړي حسن هوتک په دې اړه وویل:«که‎چېرې استعفا شوې یا نه باید د خلکو د ګټو او د افغانستان د خلکو د یووالي لپاره ومنل شي. دا موضوع باید سیاسي نه‎شي او جنجالي نه‎شي ترڅو خدای مه کړه اوضاع له دې خرابه نه‎شي.»

بلې سناټورې انارکلي هنریار هم وايي:«د بلخ په ولایت کې د ادلون بدلون دا مسله باید سیاسي نه شي.»

ښاغلی نور وايي چې په استعفاپاڼه کې یې ځينې وار له مخې شرطونه اېښي دي، خو ولسمشرۍ ماڼۍ او سیمه‎ییزو ارګانونو استعفالیک د رسنیو په واک کې نه دی ورکړی.

عطا محمد نور کابو دیارلس کاله د بلخ والي وه او په دغې موده کې پخواني ولسمشر حامد کرزي او ولسمشر اشرف غني په ځلونو د هغه د ګوښه کولو څې کړې دي.

له دې وړاندې د جمعیت اسلامي ګوند مشرتابه شورا ګواښ کړی وه، که‎چېرې ښاغلی نور له واک څخه بې واکه شي، د دغه ګوند ټول غړي به له حکومته بهر شي.