د اټومي انرژۍ د نړۍوالې ادارې عمومي مشر رافایل ګروسي د ایران پر اټومي تاسیساتو د اسراییل د برید د احتمال په اړه اندېښنه څرګنده کړې ده.

هغه زیاته کړې چې د امنیتي ملحوظاتو له امله دغه سازمان خپلو مفتشانو ته اجازه نه ورکوي چې د ایران اټومي تاسیساتو ته ورشي.

د اټومي انرژۍ د نړۍوالې ادارې عمومي مشر و ویل: "البته، موږ تل د ایران پر اټومي تاسیساتو د برید د احتمال په اړه اندیښمن یو."

په ورته وخت کې د اسراییل د پوځ لوی درستیز خبرداری ورکړی چې دوی به پر اسراییل د ایران وروستي برید ته ځواب ورکړي.

د اسراییل د پوځ لوی درستیز هرزي هالوي و ویل: "موږ په خپلو راتلونکو ګامونو غور کوو او د اسراییل خاورې ته دا ټول توغندي، کروز توغندي او ډرون بریدونه به له ځواب سره مخامخ شي."

د ایران د بهرنیو چارو د وزارت ویاند ناصر کنعاني ویلي، هېواد یې د سیمه ییزو تاوتریخوالو د زیاتولو په لټه کې نه دی.

ښاغلي کنعاني پر اسراییل وروستی برید د ایران مشروع حق وباله او زیاته یې کړه چې دا برید په دمشق کې د تهران پر کونسلګرۍ د اسراییل د برید په غبرګون کې شوی دی.

د ایران د بهرنیو چارو د وزارت ویاند و ویل: ایران د سیمه ییزو تاوتریخوالو د زیاتولو اراده نه لري. زه یو ځل بیا ټینګار کوم چې ایران د ملګرو ملتونو منشور او د نړۍوالو قوانینو پابند دی.

ایراني وګړو یو ځل بیا په تهران کې لاریون کړی او پر خپل هېواد یې د اسراییل د برید ملاتړ کړی دی.

لاریون کوونکې، ثنا بخشش و ویل: «اسراییل هیڅ نه شي کولای. دا موږ او سپاه پاسداران دي چې خبرې کوي او بیا عمل کوي، خو اسراییل یوازې خبرې کوي. "که دوی صادق وي، دوی باید عمل وکړي او یو څه وکړي، او بیا به اسراییل وګوري چې موږ به ډیر سخت ځواب ورکړو."

د امریکا د دفاع وزارت ویاند پاټ رایډر ډاډ ورکړی چې امریکا نه غواړي په سیمه کې کړکېچ زیات شي.

د امریکا د دفاع وزارت ویاند ویلي دي: «ایا اسراییل د ایران برید ته ځواب ورکوي او که نه، دا مسله ده چې اسراییل باید په دې اړه بحث او پریکړه وکړي. لکه څنګه چې د دفاع وزیر لویډ آسټین ویلي دي، په عامه او خصوصي توګه، موږ نه غواړو چې ترینګلتیاوې زیاتې شي.

دا په داسې حال کې ده چې په دې وروستیو کې د عراق لومړي وزیر محمد شیعه السوداني امریکا ته سفر کړی او په سپینه ماڼۍ کې یې له ولسمشر جوبایډن سره په کتنه کې په منځني ختیځ کې له ښکېلو خواو د زغم غوښتنه کړې ده.