د کابل امنیه قوماندانۍ وايي، د امنیتي ځواکونو ګزمې لپاره د کابل ښار ټولو امنیتي حوزو باندې موټرسایکلونه ووېشل شول.
د کابل د امنیه قومندانۍ ویاند طلوع نیوز، خالد ځدراڼ ته وايي، د موټرسایکلونو له وېشلو موخه د اختر په ورځو کې د هېوادوالو د لا ښه امنیت ټینګښت دی.
خالد ځدراڼ زیاته کړه: « د لوی اختر په مناسبت د امنیتي تدابیرو په موخه د کورنیو چارو وزارت له خوا سلګونه موټرسایکلونه د کابل امنیه قومندانۍ ته وسپارل شول. پولیس د دې موټرسایکلونو سره په ښار کې ګزمې کوي ترڅو زموږ هېوادوال اختر د خوښۍ په فضا کې ولمانځي.»
د کابل ښار د لسمې امنیتي حوزې امر، عبدالرحیم اجمل هم وویل: « موخه دا ده چې د تل لپاره په سیمه کې د ګزمې موټرسایکل وي او دا کار ګټور تمام شوی دی.»
په همدې حال، د کابل ښار کې امنیتي ځواکونه وايي، په هېواد کې د امنیت ټينګښت د دوی ورځنی مسوولیت دی.
د پولیسو سرتیري، احسان الله وویل: « د اسلامي امارت ځواکونه د ګڼې ګوڼې په ځایونو کې ګومارل شوي دي او د هغو کسانو امنیت برابروي چې د سودا او تفریح لپاره راځي.»
بلخوا، د کابل ښار اوسېدونکي د امنیت په ټينګښت کې د اسلامي امارت د ځواکونو هڅې ستايي او ډاډ ورکوي چې په دې برخه کې هر ډول همکارۍ ته چمتو دي.
د کابل اوسېدونکي، وحید حسین هم وویل: « موږ کولی شو د شپې تر یوې هم لاړ شو او راشو. کومه ستونزه نشته. که په همدې توګه امنیت ونیسي، دا ډېره ښه ده.»
د کابل د امنیه قومندانۍ ویاند دغه راز له هېوادوالو غواړي، چې د اختر په ورځو کې له هوایي ډزو، د پټاکیو، د پلاستیکي تمانچو او ورته نورو هغو شیانو له پلورلو ډډه وکړي چې عامه نظم ګډوډي او که چېرې څوک سرغړونه وکړي، قانون چلند به ورسره وشي.
په دې اړه مو اندونه